که‌چی ئه‌م حیزبانه ‌به‌بێ گرینگی دان به‌و فاکته‌رانه‌به‌ده‌ستی به‌تاڵ ده‌چنه‌سه‌ر کورسیی وت و وێژ له‌گه‌ڵ ئه‌م حیزب و ئه‌و لایه‌ن و پڕ دیاریشه ‌له ‌دانوستانێکی ئه‌وتۆ دا بۆ پێکهاتن هه‌ر ده‌بێ پاشه‌کشه‌بکه‌ی، ده‌بێ ئیمتیاز بده‌ی و نه‌رمی بنوێنی تا ئه‌و جێگایه‌ی که‌ده‌بینی شتێکی وات بۆ نه‌ماوه‌ته‌وه‌، واته‌ئه‌وه‌نده ‌نه‌رمیت نواندووه ‌که ‌له ‌چوارچێوه‌ی تاکتیک چۆته‌ده‌رێ و سنووری ستراتیژیشت به‌زاندووه‌. ده‌بینی چی وات ده‌ست نه‌که‌وتووه ‌به‌ڵام زۆر زۆر له‌ئامانجه‌ سه‌ره‌کییه‌کانت دوور که‌وتوویه‌ته‌وه‌. هه‌ندێک جار حیزبه‌کانی ئێمه ‌له ‌پێناو ئه‌مجۆره‌په‌یوه‌دی دروست کردنانه‌دا ئه‌وه‌نده ‌پاشه‌کشه ‌ده‌که‌ن و نه‌رمی ده‌نوێنن که‌فه‌لسه‌فه‌ی بوونی خۆیان و ره‌وایی خه‌باته‌که‌شیان بزر ده‌که‌ن. له‌کاتێکدا که‌هێشتا هیچ دیار نییه‌و باڵانسی هێزه‌کان ناڕوونه ‌وه‌ک لایه‌نێکی دۆڕاو ده‌که‌ونه ‌دانوستانه‌وه‌، مه‌به‌ستم ئه‌وه‌یه‌که ‌به ‌ئاسانی مه‌رجه‌کانی لایه‌نه ‌به‌رامبه‌ره‌کانیان ق‌بووڵ ده‌که‌ن و په‌یتا په‌یتا ئیمتیازیان ده‌ده‌نێ، که‌چی که‌س نازانێ بۆ کام ده‌سکه‌وت و به‌پێی کام گه‌ره‌نتی ئه‌و شته‌ده‌که‌ن. ئه‌مه‌ بۆ لایه‌نه ‌غه‌یره ‌کورده‌کانه ‌که ‌ئاوا دڵفراوان و له ‌ته‌خشان و په‌خشان کردنی به‌رژه‌وه‌ندی و مافه‌کانی نه‌ته‌وه‌که‌یاندا دڵئاوه‌ڵان، ده‌نا له‌ته‌ک یه‌کدا زۆر بێ به‌زه‌یین و موو له ‌ماست ده‌کێشنه‌وه‌، هه‌ر کامه‌و خۆی پێ ئاغایه‌که ‌و که‌س بۆ که‌سی به‌رنادا.